「驚起烽煙綠野間,東南西北總難辨,」
「骷髏谷中盡火煙,」
「被困重圍,命也難全,」
「氣力盡,人疲倦,怎脫險。」
在漫天峰火中,重輝尋覓琴娘。
「被困在烽火陣上,嘆沒法可出生天,
鶼鰈夢,被粉碎,劇憐在此葬身烈焰。」
「受劫難,心中淒楚苦難言,」
「生前不效樑上燕,死後也共結並頭蓮。」
冀王火困韋家軍於骷髏谷,危急時,呂懷良悟醒冀王野心,帶兵來救,
加上一場大火,終於合兩族之力,殺死冀王,但嫦姐姐卻陣亡。
嫦姐姐臨死時,承認堅持要殺重輝完全是因為妒忌,因為她已經愛上了這朝夕相對的世子,祗是自覺不配,不敢表白而已,並囑咐重輝與呂家完婚,共同化解兩族十八年的仇恨,故事在韋重輝的痛哭聲中完結。
1963年開山戲第一場
(多謝網友卿卿提供)
(輝兒被嫦姐姐追打著出場)
嫦:那裡走!
那裡走!
輝:真冇謂! 真冇謂! 迫我日夕定要到林泉習武藝.
嫦:你敢躲懶我定然要將你對腳完全敲跛。
(嫦姐姐用籐鞭再打輝兒)
輝:唉吔!
鞭撻無情忍痛未敢違.
嫦:我管教從嚴驚有問題。
輝:舞槍經已太無聊,
又來練棒將刀揮.
嫦:勤練武休荒廢。
輝:紫竹林內作依歸,
滿腹牢騷難盡洗,
唯對荒林冷月,
怕聽那長峽猿啼,
聊動我脆弱心靈,
觸起我迷離身世.
嫦:輝兒,
我時時都警告你千祈唔好胡思亂想,
你應該要專心一致嚟練武功.
我迫你咁樣做,
當然係有我嘅用意喇!
二十年來,
我不准你踏出紫竹林外,
更不許你以名姓告人,
假如你唔聽我嘅說話,
只怕你立招殺身之禍.
你而家唔明白嘅喇,
你將來就知道,
我對你嘅期望時新,
至有管教日趨嚴厲!
輝:嫦姐姐,
我知道嘅!
我自小就係由你一手撫養成人嘅咯,
就算你點打我,
鬧我,
我都唔敢怨你嘅!
不過我而家都經已咁大個咯,
點解你連我嘅身世來歷,
邊個係我親生父母,
都唔話俾我知呢?
嫦姐姐,
你講俾我知啦!
哪!
我都經已年將立冠,
點解在你嘅心目中,
仍當我是一個弱小孩提呢?
嫦: 吓….!
輝:你講啦!
嫦:我講…?
輝:嫦姐姐,
嫦:吓…!
輝:二十年來,
你都話等我長大成人之後就講俾我知嘅.
哪!
而家我都唔係細嘅啦!
你話係咪呀?
嫦:
係!
我知道你唔係細喇……
輝:係囉!
我而家大個仔嘅喇噃!
係咪呀?
嫦:
係!
你大個仔喇….
輝:係囉! 咁你應該講俾我聽啦!
嫦: 吓…!
輝:你講啦!
嫦:我講…? 你…你唔好問我喇!
輝:吓….
嫦:如果你問我, 我就打你嘅喇! 血海寃, 無情劍, 傷心舊事莫重提, 且待紫竹林盡化飛灰, 你你你…
輝:吓….
嫦:你便可詳明底細.
(鴉兒飛過,
發出叫聲)
嫦:輝兒, 輝兒,
輝: 吓…
嫦: 你見到嘛? 果度有隻烏鴉,
輝:見….
嫦: 你用箭快的射死佢!
輝:吓….
嫦: 射死佢啦!
輝:
射死佢?
嫦: 去啦! 你快的去射死佢!
輝: 但係..嫦姐姐, 我...
嫦: 去呀!
輝:
我唔射!
輝: 我非凶殘,
非魔鬼,
輕撫弦弓我寧不愧.
慈祥母性哺雛兒,
母鴉何辜要將命毀呢?
一鴉死後就四兒亡,
此境此情何慘厲,
惻隱之心人皆有,
瘋狂濫殺我未敢為.
我唔射呀!
我唔射!
我唔射喇.
嫦:
吓!
輝兒,
你…你真係唔射?
輝: 唔射…!
嫦: 你….你…你好! 輝兒, 物原來你係咁慈祥嘅咩? 二十年來, 嫦姐姐點樣教你? 我點解要迫你日夕練武功呢? 我點解凡係闖入紫竹林嘅生物, 我都要你殺死佢! 我就係想訓練到你有剛強嘅性格, 鐵石嘅心腸! 他日好應付你艱辛嘅使命啫! 我萬不能容許你被溫情所誤! 塵世間, 不論人獸, 決不離弱肉強食, 互相殘殺, 假如你一念慈祥, 今朝你不殺人, 他日人必殺你! 輝兒, 你而家漸漸大喇, 你開始識得反抗我喇! 估唔到我付出我嘅青春, 犧牲咗我嘅終身幸福嚟撫養你,
輝: 吓! 嫦姐姐…
嫦:而家換嚟嘅, 換番嚟嘅就只係呢種無聊嘅代價!
輝: 吓! 嫦姐姐…
嫦:
你呢種無聊嘅代價!
無聊嘅代價…!
(嫦姐姐把輝兒推倒地上)
輝: 唉吔! 嫦姐姐, 你原諒我啦, 嫦姐姐!
忍見珠淚滿桃腮,
悽切橫雲鬢,
姐無掩面背人啼.
莫怨幸福枉犧牲,
莫怨逝水送紹華,
撫心何曾忘恩惠.
昔日三歲小孩童,
今化昂藏七尺漢,
尤感你養育提攜.
為命兩相依,
習武與修文,
姐你居功至偉.
姐是好良師,
尤勝生父母,
請諒我無意犯天威.
望姐姐重歡笑,
你恕輝兒,
願在姐前長下跪.
(輝兒在嫦姐姐跟前哭跪)
嫦:輝兒,
輝:
吓…!
嫦:
有時我又係太過的嘅,
我頭先係咪打得你好痛呀?
輝: 吓…嗯…唔…唔痛….唔痛….
嫦:
真係陰功咯…!
輝兒!
你頭先係咪向我認錯?
輝:嫦姐姐,
我向你認咗錯嘅喇!
我認咗錯嘅喇!
嫦: 你…你唔啱嘅!
輝:
吓…!
嫦::
點解你要認錯咁懦弱?
我教到你今時今日,
你都仲係咁冇志氣嘅!
我要你剛強呀!
輝:剛強….
嫦: 我要你倔強!
輝:
倔強….
嫦:
你要記住,
你要成為一個鐵漢英雄,
就算錯你都要錯到底!
記唔記得?
輝:錯都要錯到底!
嫦: 係!
輝:係噃嘻!
唔錯都錯咗咯!
唔講都講咗咯嘻!
有咩野錯好認呀?
都係嫦姐姐你講得啱!
嫦姐姐你講得啱呀!
係咯,
我話過從今以後,
我自當遵從姐訓,
不敢有半點抗違係喇!
我聽曬你話嘅喇!
嫦:
係!
咁我都仲有的安慰!
輝:唔會嘅,
嫦姐姐,
我點都唔會做錯嘅喇呢次!
嫦:
你記住我嘅說話就好喇!
輝:記實嘅喇!
嫦: 輝兒,
輝:
吓…!
嫦:
我每晚到呢一個時候必在先靈之前焚香禱告,
希望我地所期待嘅大日子早的來臨唧,
我相信都唔會好耐嘅喇!
輝兒,
你記得我嘅說話,
自己好自為之喇!
輝:啊!
我知喇!
我知喇!
嫦:
我番入去先喇!
輝:
啊!
啊!
(嫦姐姐走後)
輝: 吓? 嫦姐姐佢究竟對我有咩野期望呢? 究竟我將來所要負嘅又係咩野艱辛嘅責任呢? 吓! 問佢又唔肯講, 向佢認錯都話唔啱嘅! 唉! 我真係做人難嘅咯!
眼底鞭痕紅似血,
何曾半語怨悲悽?
玉簫輕弄解閒愁,
唯借簫聲訴盡我嘅心頭翳.
(輝兒正在吹簫之際,
琴娘剛好到達.
兩人一面合唱簫琴怨,
一面憑聲音尋找對方)
輝: 琴娘!
琴:
簫郎!
輝:
琴娘!
琴: 簫郎!
輝:
琴娘!
輝: 吓!
琴娘,
琴娘,
呀!
琴娘呀!
琴:
唔?
輝: 當我地每一次相見嘅時候,
吓!
我一想起我地嘅稱呼,
我就覺得好笑嘅喇!
琴: 點好笑呀?
輝: 哪!
我重記得每一夕我以簫聲自遣嘅時候,
你必定撫琴弦相唱和嘅.
咁我地晝夕簫琴為媒以導而相識,
由巧合以至談情,
都係以簫郎琴娘互稱.
而至到今日,
大家都唔知道對方嘅真名實姓嘅.
唏!
我相信呢種情形呀,
都可算係世間破例喇掛!
琴: 琴娘自傷身世,
從不願以名姓告人.
簫郎,
輝:
吓?
琴:
我地既是相憐同病,
而且互愛者乃係對方清高嘅品格呀嘛!
呢種無聊姓氏,
就讓佢與黃土長埋.
輝: 琴娘,
琴:
唔?
輝:
你嘅身世雖然係可憐,
但比我重幸褔添.
卿慶尚知生父母,
劇憐我雙親名姓尚如迷.
天空海闊你任飛翔,
唉!
我如受覊囚遭控制.
琴: 簫郎,
你又何必自怨自嗟呢!
月都有陰晴圓缺呀嘛,
人就梗係有悲歡離合嘅喇!
君何惆悵度春歸,
幸莫自慚哀身世.
當帶人生如夢,
君勿夢中迷.
但願紫竹紅梅,
長把痴心繫.
莫負春花秋月,
更莫負此一點靈犀.
呢個知己紅顏,
願把你愁懷解慰.
輝: 寂寞玉郎心,
幸有天涯紅粉侶.
喜得名花能解語,
洗盡了孤嘆哀啼.
輕擁小蠻腰,
淺呵芙蓉臉.
琴: 唉吔!
咪啦!
細訴輕薄檀郞, 訴不盡喁喁語細.
(琴娘剛好碰到輝兒受傷之手)
輝: 唉吔!
琴: 唉吔!
唉吔!
點解你隻手會流血嘅?
輝: 啊!
無…我唔覺意自己整親唧嘛!
琴: 唔!
簫郎,
你唔使呃我喇!
又係唔係……
輝: 係…..係囉……..
琴: 你唔好講咁多喇!
你快啲坐埋去先,
等我揾啲水同你洗乾淨個傷口啦!
輝: 啊!
(琴娘用溪水沾濕手巾替輝兒敷傷口)
琴: 唉!
陰功咯!
琴: 輕替玉郎敷傷勢,
輝:
唉吔!
琴:
好痛呀?
輝:
唔痛…….唔痛!
琴: 責多儆違,
輝:
你對我咁好,
試問幾生修得到呢?
真係打多幾次都唔區喇!
琴: 你喋喋說流言誓,
當信我願代以身相替,
解君災危.
輝: 肉痛吓幾咁閒呀!
淨係而家個心甜就夠抵番啦!
琴: 長日將你難為,
痛在儂心非虛偽.
輝: 琴娘,
我相信世間上真正憐惜我,
愛護我嘅人只有係你.
我自懂人性以來,
日夕長困紫竹林中,
對住一個喜怒無常嘅嫦姐姐喎!
唏!
佢嘅個性不只難於捉摸,
仲非常咁古怪添.
佢要我成為一個殘酷寡情,
心腸如鐵嘅人物.
其實呢一種枯燥嘅生涯,
我老早就經已厭倦喇!
不過自從識咗你之後,
我至知道人間有温暖,
咁對人生至開始有信念嘅咋!
琴娘呀!
你知唔知道你在我嘅生命之中係有咁重要嘅無形鼓勵嘅呢!
琴: 簫郎,
我唔希望淨係單獨係我至可以鼓勵你,
你應該要自己嚟鼓勵你自己呀!
我可以…….
輝: 吓! 咩嘢呀?
琴: 簫郎,
我唔怕大胆啲講句呀……!
你果個嫦姐姐咁様嘅想法係錯誤嘅!
不論對人對事,
都應該有忠恕仁愛之心呀嘛!
將來得益嘅都係你本身嘅咋!
你如果能依從我呢句說話去做嘅,
你嘅前途至有無限光輝呀!
輝: 呀!
真係諗落呀真係好笑喇!
原來你嘅個性同我嘅嫦姐姐係完全相反嘅喎!
一個品質嬌柔如水軟,
一個無情冷酷半含威.
一個願憑仁愛導眾生,
一個鐵石心腸如惡鬼!
(突然,
遠處傳來嫦姐姐叫喚之聲)
嫦: 輝兒!
輝:
啊!
吓…….!
嫦:
快啲入廳祭袓!
輝: 吓!
啊!
閉喇….閉喇!
琴:
叫你喇!
輝: 嫦姐姐又叫我喇!
我唔入去唔得嘅!
你係度等我一陣喇!
我要即刻入去…….我即刻入去!
(輝兒怱怱離去,
留下琴娘)